HomeBandGoodiesGuestbookBooking
 
Pics
Music
Lyrics
Supporters
Links
 
   
 



I bi greist i aui färne Länder
tuusig Stedt ha ig scho gseh
aber bi niene länger blibe
bi ging gärn wieder zrügg

Die mit Fernweh gö ab i Süde
die mit Stil die verwiile hie
Es git ke Grund für vo hie ds verschwinde
Aber tuusig für hie z siii

Das isch dr Summer i dr Houptstadt
am schönste Ort uf dere Wält
Das isch dr Summer i dr Houptstadt
und i bi no nie so zfriede gsi

Dolce far niente uf dr Pläfe
grossi Party i dr Matte
geili Musig uf em Güsche
Strassecafés am Hirschegrabe

Mmmmmmh Chopfsteipflaschter glüeht
chüehls Wasser i de Brünne
Uuuuu dr Rosegarte dä blüeht
und mir geits eifach guet

I chehre mi uf em Badtuech
u blinzle gäge d Sunne zue
d Meitschi richte d Hösli
und d Giele luege spitz

Aarewasser uf dire brune Huut
vo hie wott i sicher nie meh furt
mit Glace uf dine weiche Lippe
gisch du mir e tööööife Kuss

-----------------------------------------------------------------------------------------


We sie am Füfi aube aafö
bini gäng ganz närvös
Öb sie hinech äch uf mi iischlö?
Wird dr Ton hüt nid so bös?

I wär gärn a dr Aare
Wiit ewäg vo däm Gschrei
Aber snützt nüt – ke Aare
Bi feschtgschrubt und im Rathuus dehei

I bi ja nume es Mikrofon
I nime auui wie sie si
U het o mänge e üble Ton
I nime stooisch alles hi

Dr eint schmöckt geng chli nach Zitrone
Die anderi meh nach Patschuli
Eine tuet wie bi de Klingone
U sie brucht immer d Händ drbi

U we de dä chunnt wird’s ging luschtig
De gits e Pouse ab und zue
De wirdi plötzlich eifach abgstellt
Und ha ändlich mini Rueh!

-----------------------------------------------------------------------------------------


D Partei hett gschwore: „Du bisch üse Maa!
Chum Rögu,  itz gang dra!“
O si Frou hett ihn unterstützt,
ir Hoffnig drum, dass es öppis nützt.

Chugelschriber, Flyer und o Chläber,
alles hett dr Röschu Wäber.
Lachet mit sim Elmex-Lächle
vo jedere zwöite Plakatwang abe.

D Weschte wiiss u Kravatte sitzt,
farblich abgstimmt, isch kei Witz!
Ufe Röschu uf dä chasch boue,
im vertroue, da spielt Gäud ke Roue!

Röschu gäu Du machsch es allne rächt,
aues andre wär doch schlächt!
Drum wählt itz o wär ne kennt
dr Wäber Röschu for President!

Si Slogan ja hett viiiiiiiel koschtet,
ou es Programm hett är poschtet.
Me hett ihm gseit: „Mach Dir ke Sorge,
drmit gwinnsch Du no vor em Zmorge!

Ir Beiz, ir Zittig u a jedem Egge
damits o würklich aui tschegge:

D Armee isch richtig, d Kultur o wichtig!
Dr Verchehr söu fliesse, und Pflanze spriesse!
A die Arme dänke, und d Stüüre sänke.
Dr Strom us Wind, und gnue Platz für d Chind!

Verteile tuet är Schocolat,
denn klar dr Röschu isch für aui da!!!

Wahltag isch Zahltag, das weiss jedes Chind
d Stimme wärde zeut, was zeut isch d Stimm
Siegessicher sitzt är deheim ir Chuchi am Radio
Sini Frou chätschet Fingernegu, da chöme d Resultat:

Wit abgschlage uf em letschte Platz,
si  Troum ja dä isch platzt!
E besseri Wäut hätts söue wärde,
für ihn, sini Frou und aui uf dere Ärde!

Mir hoffe Dir heit öppis glehrt
us dr Moral vo dere Gschicht:
Mit Gäud allei, da gwinnsch ke Wahl.
Was zeut si Härzbluet und Ideal!

-----------------------------------------------------------------------------------------


Jede Donschti hocke mir uf üsne Schtüehl
Heis säute luschtig – zeige keni Gfüehl
Aus isch gspannt was hüt no aus passiert
Was dr Presi wieder hett vorprogrammiert

Vo links u vo rächts
vo rächts u vo links
vo links u vo rächts
hei mir Bock ufe Rathuusrock

D Antworte si geng wie geng nid ganz neutral
Teu säge, zuezlose, das sig e Qual
O dr Gmeindrat seit was ihn so dünkt
Hett meischtens Iwänd in e huufe Pünkt

Jede geit ga rede und seit glich nid viel
Das isch haut so wie bi jedem Schpiel
Für d Press da steit me as Mikrofon
Das öppis chasch läse i dr Zitig vo morn

-----------------------------------------------------------------------------------------


Sie rede rede rede rund um d Uhr
vo Gäld, Geischt und Kultur
Ewig die gliche Theme wärde neu vertont
Wenni nume wüsst öpp das sich lohnt

Problem gits weni,
die meischte wärde gmacht
Wes würklich um öppis geit
gits meischtes e Egoredeschlacht

U mir stimme itze ja
U mir stimme itze nei
U mir göh no lang, göh no lang
Mir göh no lang nid hei

U si rede rede rede
U si sitze sitze sitze
U si stimme stimme stimme
U si hei e Plan
Zoneplan, Richtplan,
Masterplan, Stadtplan
Was de für ne Plan?
O wemä i däm Gstürm nid immer druss chunnt
U eim jedä Donnschtig dr Schädu brummt
Mir hei e Plan, und dä Plan isch guet
Är brucht chli Muet, aber tuet huere guet!
U mir singe, singe, singe
U mir tanze, tanze, tanze
U mir spiele spiele spiele
Das isch üse Plan!
Usem chline graue Äntli
Wird ä grosse wiisse Schwan
Usem aute Gmeindspolitiker
Ä riese Music Star

Sie sitze sitze sitze uf ihrne Stüehl
U mängisch stöh sie uf
U loufe de chli ume mitemene wichtige Gsicht
Ooooh ja das stöh sie druf

-----------------------------------------------------------------------------------------


Ä normale Donschti Abe uf em Bäreplatz
D Stammtisch si bsetzt bis uf e letschti Platz
D Stimmig isch locker, d Stimmig isch luut
D Bierli wandere über d Bar zu de Lüt

Die roti Boulevardzitig isch ihri Bible
Dr Hopfesaft hilft bir Meinigsbildig
Sie rüefe us wie ne Wald voll Affe
Riisse d Schnurre uf grad nach em schaffe

Die in Bärn chöi üs all am Ranze hange
die mache ja glich ging was sie wei!
Svetlana! Bring üs no zwe Stange
hüt gö mir no laaaaaang nid hei!  


Dr Aschi läschteret über d Banke
Dr Bidu zeigt ke Verständnis für die Chranke
Die vor Wirtschaft si doch aus Halunke
rouke darfsch nid mau meh ir Spelunke

Dr Chrigu möcht uf de Strasse raase
Dr Hund vom Nachbar schisst uf Housis Raase
Dr Reto findet die stinke doch bim choche
Und dr Richu isch e grosse Fän vom Blocher

Das Wuchenänd isch Urnegang
aber dr Stammtisch blibt deheime
Am TV chunnt e Fuessballmatch
und bi de andere frässe die Verwandte

Ig, ga stimme? Ja chasch dänke!
Zerscht würdi mi erhänke!
Das bringt doch nüt, für was de ou?
Das sägi o ging miner Frou!

-----------------------------------------------------------------------------------------


Mir wünsche üs id Exekutive
so mit Kollegialitätsprinzip
das wär no chic, das wär no chic

Mir wünsche üs id Exekutive
de müesste mir üs vo Amtes wäge
nöcher cho, nöcher cho, ja das wöi mir o!


Sie isch vo dr lingge Site cho
vo Marx u Ängels u no meh
är ä rächte Maa usem Weschte oder so
Im Rathuus hei sie sich z erschte Mau gseh

Hei sich heftig gfäzt im Parlamänt
mit gschide Vote – nie mit de Händ
U jedes Mau bim Abschied näh
Hei sie sich agluegt, als würds ke Morge gäh

Politisch si sie erbitteriti Finde
är für Freiheit, sie für Staat
doch sie hei sich gärn gha, meh als nume Fründe
im Härz es Gnuusch, im Chopf, im Chopf e Spagat

Ir Partei hei sie sich richtig ghasst
im Gheime gliebt, es isch ke Gspass
e linggi Zicke und e rächte Prolet
ging strüber isch es worde Tag für Tag

Wie gäng ir Politik si d Wahle cho
Sie hei aues gäh und hei aues gno
Ire Troum, id Regierig, wäg vom Parlament
am Schluss, am Schluss hei es paar Stimme gfäut

Sie hei no zletschte Zmorge gno
ds Hanoi oder irgendwo
Nomau vier Jahr bis wieder Wahle si
so ewig läng, so furchtbar ewig wiiiiit

-----------------------------------------------------------------------------------------


Gloubsch Du wie ig, a die grossi Liebi?
A ne Liebi wo jede Sturm übersteit?
A ne Liaison fürs ganze Läbe?
A ne Liebi zwüsche Dir und mir?

Di Glanz und Di Charme hei mi packt
Dini Strasse und Plätz si mir so vertrout
Dini Mönsche füehle sich hie deheime
Jede Tag gspüre ig das vo neuem

Blib für immer so wie de bisch
Bhaut die Chraft wo Du mir gisch
Schützisch mini Seel und o mis Läbe
Bis as Ändi vo mine Täg!

Für immer Bärn, Du bisch mini Stadt, für immer Bärn
Für immer wotti bi Dir blibe, für immer, für ewig

Dini Gschicht isch läng
Dini Gschicht isch gross
Nid jede Erfolg faut Dir i Schoss
Oft hesch Du müesse richtig kämpfe
Hesch Bluet und hesch Wasser gschwitzt

Aber vorwärts geits Tag für Tag
Hesch mi immer wieder witer bracht
I danke Dir für all die Tate
Wett nüt vo all däm misse

-----------------------------------------------------------------------------------------


Es räblet u tuet, i de Bärner Gasse
D Lüt strecke ihri Gringe us de Fänschter

Wird da gschleglet, ischs e Boxkampf
Oder isch sone Demo im Gang?

Dört i gseh ne! Itz isch är wäg!
Itz chunnt är füre, steit mir i Wäg!

Drü Meter höch, e dunkli Gstalt
mit brunem Pelz vo Chopf bis Fuess!

Ja ja, dr Bääääär isch los! Ja ja, dr Bääääär isch los!
Ja ja, dr Bääääär isch los! Ja ja, dr Bääääär isch los!

Was suecht er? Ja was wott er?
Wie hett äch dä us sim Chäfig chönne?

Är hett Plan! Är hett es Ziel!
Uf diräktem Wäg em Bundeshuus zue

Ohni z Chlopfe – eifach ine!
Niemer versperrt ihm dr gwählti Wäg

Zu de höche Herre – ja das wott er
Trampet ohni zfrage ine Bundesratssitzig

Hey loset zue! I la ke Rueh!
I bruche Rüebli und no Honig drzue!

I weiss Dir heit das! Auso rückets use!
Süsch gö mir de mau chli zäme use!

Bi süsch e Liebe! Und ou e Nätte!
Aber wenn i Hunger ha hilft nur no Bätte!

De ziehni los! De machi Krach!
U erscht wenn i gnue ha gani wieder Heiiiiiiiiii!